Татар дөньясы 27 октябрь 2018 18:23

Разил Вәлиев “Татарча диктант”ка Гаяз Исхакый әсәрен сайлау - аны ихтирам итү, дип саный

Гаяз Исхакыйның теле сокланып туймаслык матур, диде Татарстанның халык шагыйре.

Скопировать ссылку

(Казан, 28 октябрь, “Татар-информ”, Динә Йосыпова). Язучы, шагыйрь, Татарстан Дәүләт Советы депутаты Разил Вәлиев “Татарча диктант”ка язучы, публицист, нәшир һәм сәясәтче Гаяз Исхакыйның әсәреннән өзекне сайлау аны ихтирам итү, дип саный.

Бүген Татарстан Республикасы Милли китапханәсендә “Татарча диктант” акциясе үтте. Акциядә 55 кеше катнашты. Гаяз Исхакыйның “Көз” повестеннан өзекне Разил Вәлиев укыды.

Разил Вәлиев “Татар-информ” мәгълүмат агентлыгы хәбәрчесенә “Татарча диктант” текстларын бүгенге әдәби телгә якынайтканнар, диде. “Быел “Татарча диктант”ка Абдулла Алиш һәм Гаяз Исхакый әсәрләреннән өзекләр сайланган.

"Быел классик язучыбыз Гаяз Исхакыйның тууына - 140 ел. Бу – аңа ихтирам, хөрмәт күрсәтү. Билгеле, Исхакыйның теле бүгенге әдәби телдән бераз аерыла, әмма ул өзекләрне күпмедер җиңеләйткәннәр”, - диде ул.

Разил Вәлиев Гаяз Исхакыйның телен сокланып туймаслык матур, дип атады. “Мәсәлән, текстта “гармун көйләве” дигән сүзтезмә бар иде. Без хәзер гармунда уйныйбыз, ә ул вакытта гармунда көйләгәннәр. “Гармунда көйләү” “гармунда уйнау”га караганда матуррак, чөнки “көй” сүзе гармунга бик туры килә, ә “уйнау” дигәндә, аны бала-чага да уйный ала, театрда артистлар да уйный ала. Бу миңа, язучыга, бик тә кызыклы булып тоелды”, - диде ул хәбәрчегә.

Быел “Татарча диктант” акциясендә катнашучы татарстанлылар язучы, публицист, нәшир һәм сәясәтче Гаяз Исхакый әсәреннән өзек, ә чит илләр һәм төбәкләр балалар әкиятләре һәм драма әсәрләре авторы Абдулла Алиш әсереннән өзек яздылар.

#татарча диктант #разил вәлиев #милли китапханә #гаяз исхакый

Сәхифәләр

Разил Вәлиев “Татарча диктант”ка Гаяз Исхакый әсәрен сайлау - аны ихтирам итү, дип саный