Мөфти Таҗетдин: Ураза гаете - ислам динен тотучыларның гына бәйрәме түгел
Россиянең баш мөфтие, мөселманнарның Үзәк Диния нәзарәте башлыгы Тәлгать Таҗетдин Ураза гаете - ислам динен тотучыларның гына түгел, ә бөтен кешеләр өчен уртак бәйрәм, дип белдерде. Бу турыда РИА Новости яза.
«Бу - ислам динен тотучыларның гына бәйрәме түгел, ә гомуми бәйрәм. Бу тынычлык, дуслык, иң яхшы кешелек сыйфатларын күрсәтү һәм бер Аллаһы Тәгаләгә табыну бәйрәме», - диде мөфти.
Таҗетдин шулай ук ураза ае мөселманнар өчен генә түгел, ә бөтен дөнья өчен истәлекле булды, дип өстәде. Ул нәкъ менә Рамазан аенда Согуд Гарәбстанының изге җирләрендә Россия һәм АКШның беренче катлаулы сөйләшүләре узуын искәртте. Мондый вакыйга, мөфти сүзләренчә, Аллаһы Тәгаләнең Рамазан аенда бөтен кешелекне уйланырга, тынычлык урнаштырырга, явызлыкны онытырга чакыруы турында сөйли.
«Без Ураза бәйрәменә бөтен дөньяда сәяси вәзгыятьнең алга таба тотрыклылануына ышанып керәбез», - дип искәртте Үзәк Диния нәзарәте башлыгы.
Мөфти берничә сәбәп аркасында ураза тота алмаучыларны гаепләмәскә чакырды. Аның фикеренчә, мондый кешеләргә дини нормаларны һәм кагыйдәләрне үтәргә омтылуда ярдәм итәргә кирәк.
Таҗетдин билгеләп үткәнчә, бу бәйрәмдә туганнарны һәм якыннарны гына сыйлап калмыйлар, ә бөтен кешегә игътибар күрсәтәләр. Мөфти бер ханымның мәчеттә намаз укыганнан соң елга буена кошларны ашатырга китүен мисал итеп китерде.
Ахырда Тәлгать Таҗетдин бар кешегә тынычлык, бәхет һәм Аллаһы Тәгаләнең мәрхәмәтен теләде.
Ураза гаетенең төп бәйрәм чаралары быел Казанның Мәрҗани мәчетендә узды. Бәйрәм намазын Татарстан мөфтие Камил хәзрәт Сәмигуллин алып барды. Намазда ТР Рәисе Рөстәм Миңнеханов катнашты.