Моди Россия белән Украина арасындагы конфликт тыныч юл белән хәл ителергә тиешлеген әйтте
Россия белән Украина арасындагы конфликт тыныч юл белән хәл ителергә тиеш, Һиндстан моңа мөмкин булган ярдәмне күрсәтергә әзер, дип белдерде Һиндстан премьер-министры Нарендра Моди Казандагы БРИКС саммиты кысаларында узган Россия Президенты Владимир Путин белән очрашуда.
«Россия һәм Украина арасында дәвам иткән конфликтны хәл итү юлларын эзләү буенча без даими рәвештә элемтәдә торабыз. Элегрәк әйткәнемчә, без барлык проблемалар тыныч юллар белән хәл ителергә тиеш дип саныйбыз һәм әлеге илләр арасында тизрәк тынычлык торгызуны тулысынча хуплыйбыз. Без киләчәктә дә теләсә нинди ярдәм күрсәтергә әзер», - дип белдерде Моди.
- Һиндстан премьер-министры Нарендра Моди Казанга бүген, 22 октябрь көнне БРИКС саммитында катнашу өчен килде.
- Ул Россия Президенты Владимир Путинга кунакчыллык өчен рәхмәт белдерде.
-
БРИКС илләре саммиты Казанда 22-24 октябрьдә уза. БРИКС – 2006 елда төзелгән дәүләтара берләшмә. Россия 2024 елның 1 гыйнварыннан БРИКСта рәислекне үз өстенә алды. Ел берләшмәгә яңа әгъзалар кушылудан башланды – Россия, Бразилия, Һиндстан, Кытай һәм Көньяк Африка Республикасыннан тыш, аңа хәзер Мисыр, Эфиопия, Иран, Берләшкән гарәп әмирлекләре һәм Согуд Гарәбстаны керә.