Казан циркы директоры эшеннән азат ителә
Ярсыган директор сурәтләнгән видеоязма ике көн элек телеграм-каналларда таралган иде.
(Казан, 26 ноябрь, «Татар-информ», Рузилә Мөхәммәтова). Казан циркы директоры Рамил Шәрифуллин белән хезмәт килешүе өзелә.
«Хезмәт тикшерүе нәтиҗәсе буенча „Казан дәүләт циркы“ дәүләт мәдәният учреждениесе директоры белән хезмәт килешүен өзү турында карар кабул ителде», — дип хәбәр итә ТР Мәдәният министрлыгының матбугат үзәге.
24 ноябрь көнне телеграм-каналлар аша таралган видеода ярсыган директорның хезмәттәше кереп бикләнгән бүлмә янында йөренүе күренә. Соңрак Рамил Шәрифуллин бу хәлне аңлатып — үзенең авыр ел булуы, нервылары түзмәве турында шәрехләп язган, хатасы өчен гафу үтенгән.
Мәдәният министры Ирада Әюпова журналистларга барысының хокукый нормалар аша бәяләнәчәген әйткән иде.
Рамил Шәрифуллин Казан циркы директоры итеп 2019 елның мартында билгеләнгән иде. Рамил Шәрифуллин элеккеге цирк директоры Дамир Шәрифуллинның улы.
- Казан циркы директоры үзе катнашкан низаг турында аңлатма бирде һәм гафу үтенде
- Ирада Әюпова Казан циркы директорына бәйле вакыйгада хискә өстенлек бирмәскә чакырды
- Рөстәм Миңнеханов: Казан циркы директоры белән булган хәл дисциплинар җәза таләп итә