Авыл 27 август 2019 19:16

Ашлыкка бәя артса, Татарстан социаль икмәкләрне субсидияләүгә кире кайтачак

Бүгенге көндә базарда ашлыкка ахыргы бәяләр әле билгеләнмәгән.

Скопировать ссылку

(Казан, 27 август, “Татар-информ”, Динә Йосыпова). Ашлыкка бәя арткан очракта, Татарстан социаль икмәкләрне субсидияләүгә кире кайта ала. Бу хакта бүген ТР Министрлар Кабинетында үткән брифингта ТР авыл хуҗалыгы һәм азык-төлек министры Марат Әхмәтов белдерде.

Марат Əхмәтов әйтүенчә, баланс табу өчен беренче яртыеллыкка социаль икмәкләргә субсидия кертелгән, икенче яртыеллыкта – юк. “Ноябрьгә кадәр, икмәк бәяләреннән чыгып, азык–төлек базарында бәяләр күтәрелсә, социаль икмәкләрне субсидияләүгә кайтырга туры киләчәк”, – дип сөйләде министр.

Марат Əхмәтов бүген ашлыкка бәя бераз төшүен әйтте. Бөтен кышкы һәм язгы чорда бәяләр, өченче ел белән чагыштырганда, югарырак булган. “Базарда ашлыкка ахыргы бәяләр билгеләнмәгән әле. Урып-җыю чорында алар, кагыйдә буларак, үзгәрә”, – дип йомгаклады министр.

Бүгенге көндә Татарстан Россия төбәкләре арасында бодай икмәге бәясе буенча тугызынчы–унынчы урында тора.

#марат әхмәтов #ашлык #социаль икмәк

Сәхифәләр

Ашлыкка бәя артса, Татарстан социаль икмәкләрне субсидияләүгә кире кайтачак