Яңа Чәчкап мәктәбе директоры: Авылда шагыйрь Әхмәт Рәшиткә бюст куясы иде

Буа районы Яңа Чәчкап авылы мәктәбе директоры Рөстәм Бикмуллин шагыйрь Әхмәт Рәшиткә авылда бюст куярга кирәк, дигән фикердә. 

«Авылда Әхмәт Рәшитнең бюстын булдыру бик әйбәт булыр иде. Без бу темага авыл җирлеге башлыгы белән дә сөйләшкән идек. Киләчәктә тормышка ашырырга уйлыйбыз», – дип сөйләде ул «Татар-информ» хәбәрчесенә. 

Директор мәктәпкә шагыйрьнең исемен бирү турында фикерләр булуын әйтте.  

«Мәктәпкә Әхмәт Рәшитов исемен бирергә, дигән фикер дә туган иде. Безнең перспектива сөендерерлек түгел. Ел саен укучылар саны кими. Үткән елга кадәр урта мәктәп идек, быелдан 9 сыйныф кына калды. Мәктәптә 36 бала укый, 15 укытучы белем бирә», – диде ул.

Кичә мәктәптә Әхмәт Рәшит имемендәге «Кояшлы ил» VII республикакүләм фәнни-гамәли конференциясе узды.