Васил Шәйхразыев: Күпчелек эшмәкәр авылларны саклап калуга ярдәм итеп тора
Татарстан Республикасы Премьер-министры урынбасары, Бөтендөнья татар конгрессы Милли Шурасы рәисе Васил Шәйхразыев татар эшмәкәрләренең авылларны саклап калуга өлеш кертүләрен әйтте. Бу хакта ул Бөтендөнья татар конгрессының XIII Бөтенроссия татар авыллары эшмәкәрләре җыены ачылышында сөйләде.
«Хәтерлисезме, 20 элек Татарстанда: «Сөт савыр алдыннан сыерларга классик музыка тыңлатсагыз, алар сөтне күбрәк бирә, сөт баллырак, тәмлерәк була», – дип аңлата башлаган иделәр. Әлеге җыенга ел саен килгән кеше: «Рәхмәтлемен, тагын да үсеш кичерәсем килә», – дисен иде. Бизнесның төп законы – керем. Табыш булгач, аны төрле өлешкә бүләргә була: үсешкә, дивидендка һ.б. Безнең төп максатыбыз – татар авылларын саклап калу. Күпчелек эшмәкәр авылларны саклап калуга ярдәм итеп тора», - диде ул.
Васил Шәйхразыев фикеренчә, табышның бер өлеше татар авылын күтәрүгә – мәчет, мәдәният йорты, Сабан туе, мохтаҗларга, зиярәтләргә бирелсә, ислам дине ягыннан караганда бу – бәрәкәт була.
«Баш казый һәрвакыт шуны әйтеп тора: «Эшмәкәрләр – сыер кебек, аларны һәрвакытта да савып торырга кирәк. Сауган сыер гына күп итеп сөт бирә», – ди. Дөрес бит. Ислам динендә болай: әгәр табышыңнан бер өлешеңне бирәсең икән, Аллаһы Тәгалә сиңа аңа рәхмәтле булып, бермә-бер арттырып бирә, ди. Эшмәкәр буларак, сезнең йөрәгегез бар. Сәдака, мохтаҗларга ярдәм бирәсездер, йөрәк бит бәрәкәт ала. Күңелдә тыныч була», - диде Милли Шура рәисе.
«Бергә булыйк, бердәм булыйк. Өч көн эчендә бер-беребезгә карата әлеге сыйфатларны күрсәтик. Бергәләп үсәр өчен, сораулар, тәкъдимнәр, шелтәләр кабул ителә», - дип өстәде ул.