Ленар Гарипов Ясалма фәһемне Татарстанда авыл хуҗалыгында куллану очрагын сөйләде

Татарстан Авыл хуҗалыгы һәм азык-төлек министрының беренче урынбасары Ленар Гарипов Бөтендөнья татар конгрессының XIII Бөтенроссия татар авыллары эшмәкәрләре җыены ачылышында Ясалма фәһемне авыл хуҗалыгында куллану турында әйтте.

«Республикада пилот проект буларак берничә хуҗалыкта Ясалма фәһем нигезендә сыер савуны контрольгә тоту системасы кертелде. Ул процессны реаль вакытта күзәтеп барырга, сыер савуның регламентын үтәмәү очракларын ачыкларга мөмкинлек бирә. Сыер сауганда ялгышлык китә икән, әлеге система җитәкчегә, бригадир, сантехник, ветеринар табибка кисәтү җибәрә», - диде ул чыгышында.

Аның әйтүенчә, икенче бер хуҗалыкта терлекчелекнең халәтен анализлау системасы кертелгән.

«Әлеге система терлекнең аксый башлавын ачыклау өчен даими мониторинг ярдәмендә аларны күзәтергә мөмкинлек бирә. Ясалма фәһем хайваннарның йөрешендә һәм халәтендә кеше өчен сизелмәгән үзгәрешләрне теркәп барырга сәләтле. Нәтиҗәдә, малларны тизрәк дәвалау мөмкин, даруларны да экономияләп, сыерны исән калдырып була», - диде Ленар Гарипов.

Ул татар авыллары эшмәкәрләрен авылда туып үскән, аның кадерен белеп, төпле хезмәт тәрбиясен алып үскән «чын җир уллары һәм кызлары» дип атады. «Шундый җыеннар безгә үзара эшлекле элемтәләр булдыру һәм тәҗрибә уртаклашу өчен зур мөмкинлек бирә. Бүген үзгәрешләр чорында авыл хуҗалыгы эшмкәрләренә таянып яши, сез – авылны үстерүчеләр, яшәтүчеләр һәм эш урыннарын булдыручылар. Авылда эш булса, ул яши», - диде.

• 26-28 февральдә Бөтендөнья татар конгрессы XIII Бөтенроссия татар авыллары эшмәкәрләре җыенын уздыра. Быел әлеге җыенга Россия Федерациясенең 48 төбәгеннән, шулай ук Татарстаннан 900 кече бизнес вәкилләре, фермер хуҗалыклары җитәкчеләре һәм хакимият органнары вәкилләре җыелды. Өч көнлек программада дискуссион мәйданчыкларда эшләү, Татарстан Рәисе катнашында пленар утырыш, Татарстанның Апас һәм Тәтеш районнарына сәфәр һәм мәдәни программа каралган.

  27 февральдә җыенда катнашучылар Татарстан Республикасының Апас һәм Тәтеш муниципаль районына сәфәр кылачак. Биредә алар җирле эшмәкәрләренең хуҗалыклары, агросәнәгать комплексларындагы казанышлар, инновацион технологияләр, инфраструктураны үстерүдә алып барылган эш тәҗрибәсе белән танышачаклар. Әлеге сәфәр эшлекле элемтәләр булдыру өчен дә ярдәм итәчәк.