ТР Үзәк сайлау комиссиясе төзәтмәләр буенча тавыш бирү вакытында 13 шикаятьне карады
РФ Конституциясенә төзәтмәләр буенча вакытыннан алда тавыш бирү атнасы дәвамында бюллетеньнәр әрҗәсендә пломба өзелү очрагы теркәлгән.
(Казан, 1 июль, «Татар-информ», Марат Ишкилдин). ТР Үзәк сайлау комиссиясендә РФ Конституциясенә төзәтмәләр буенча тавыш бирү вакытында хокук бозуларга карата 13 шикаять кабул ителде. Бу хакта ТР Үзәк сайлау комиссиясе рәисе Андрей Кондратьев хәбәр итте.
«Бүгенге көндә 13 шалтырату һәм мөрәҗәгать кабул ителде, аларны тискәре дип бәяләргә мөмкин. Алар барысы да каралды», - диде Кондратьев.
Бер очрак Яңа Савин районында булган. Гражданнар тартмаларның берсендә пломба булмавына игътибар иткән.
«Шунда ук чаралар күрдек, урнадагы бюллетеньнәрне сейф-пакетка салдык. Бүген комиссия бу уңайдан карар кабул итәчәк. Без бу хәлне катгый контрольдә тотабыз», - диде спикер.
Элегрәк ведомство сайлау участокларында закон бозулар буенча гражданнарның 11 мөрәҗәгате турында хәбәр иткән иде. ТР Үзәк сайлау комиссиясе башлыгы сүзләренә караганда, килүче хәвефле сигналларның күпчелеге тикшерү барышында фейклар булып чыга.