Әтнә районы игенчеләре беренче булып урып-җыюны төгәлләде
Бүгенге көнгә Татарстанда 4,7 млн тонна яңа уңыш җыеп алынган.
(Казан, 2 сентябрь, «Татар-информ»). Татарстанның Әтнә районы игенчеләре беренче булып урып-җыюны төгәлләде. Бүген нефть-газ химиясе форумы ачылышында алар республика Президенты Рөстәм Миңнехановка бу елның беренче уңышыннан пешерелгән икмәкне тапшырдылар. Бу турыда Татарстан Авыл хуҗалыгы һәм азык-төлек министрлыгы хәбәр итте.
«Хөрмәтле Рөстәм Нургалиевич, Сезгә район игенчеләре исеменнән 2020 ел уңышы ашлыгыннан пешерелгән икмәкне тапшырырга рөхсәт итегез!» — ди Әтнә игенчеләре.
Бүгенге көнгә Татарстанда 4,7 млн тонна яңа уңыш ашлыгы, игенннәр 1,3 млн га мәйданда (барлык мәйданнарның 86 проценты) җыеп алынган, бер гектардан уртача уңыш — 36,4 центнер, бу узган елга караганда гектардан 6 центнерга күбрәк.