Татарстанның халык шагыйре Разил Вәлиев белән хушлашу иртәгә Камал театры каршында була
Күренекле җәмәгать эшлеклесе, язучы, Татарстанның халык шагыйре Разил Вәлиев белән хушлашу иртәгә 9.30 сәгатьтә Галиәсгар Камал исемендәге Татар дәүләт академия театры каршында узачак.
«Разил абый белән хушлашу иртәгә Камал театры каршында була», – диде «Татар-информ» хәбәрчесенә Разил Вәлиевның туганы, Түбән Каманың үзәкләштерелгән китапханәләр берләшмәсе җитәкчесе Гөлназ Арсланова.
- Разил Вәлиев бүген 76 яшендә вафат булды.
Разил Исмәгыйль улы Вәлиев – язучы, шагыйрь, күренекле җәмәгать һәм сәясәт эшлеклесе, Татарстанның халык шагыйре, Татарстан Республикасының Габдулла Тукай исемендәге Дәүләт премиясе лауреаты (2007), Татарстанның Муса Җәлил исемендәге республика премиясе лауреаты, Россиянең һәм Татарстанның атказанган мәдәният хезмәткәре, Россия Гуманитар Фәннәр Академиясенең шәрәфле академигы. Татарстан Фәннәр академиясенең шәрәфле әгъзасы (2017). Түбән Кама шәһәренең мактаулы гражданы. Ингушетия Республикасының атказанган сәнгать эшлеклесе. 40тан артык китап, 4 пьеса, 200дән артык җырлар авторы.
1990 елдан Разил Вәлиев – Татарстанның халык депутаты, 2000 елдан ТР Дәүләт Советында Мәдәният, мәгариф, фән һәм милли мәсьәләләр буенча даими рәисе булып хезмәт куя, 2008 елдан Халыкара ПЕН-клубының Татар ПЕН-үзәге президенты булып тора.