Авыл 19 сентябрь 2018 19:09

Татарстанда пай җирләре өчен түләү ел ахырына кадәр дәвам итә

Бер гектар пай җире өчен 700 сумнан да кимрәк түләнергә тиеш түгел, диде министр урынбасары.

Скопировать ссылку

(Казан, 19 сентябрь, “Татар-информ”, Чулпан Шакирова). Татарстанда пай җирләрен арендага алган хуҗалык милекчегә бер пай өчен 700 сумнан да кимрәк түләргә тиеш түгел. Бу хакта “Татар-информ”да узган матбугат очрашуында авыл хуҗалыгы министры урынбасары Илдус Габдрахманов әйтте.

“Безнең күрсәтмәләр буенча, бер гектар пай җиренә 700 сумнан да кимрәк түләнергә тиеш түгел. Милекчегә аренда хакын күбрәк бирергә ярый, кимрәк булса – дөрес булмый. Бүген республикада пай җирләрен кулланган өчен исәп-хисап эшләре бара. Тулырак мәгълүмат ел ахырында билгеле булачак”, - диде Габдрахманов.

Урынбасар пайчыларның хокукларын да искә төшерде. “Әгәр бүген мин пайчының җирен арендага алам икән, аның белән килешү төзергә тиешмен. Килешүдә җирдән файдаланган өчен нәрсә белән түләнәчәге ачык күрсәтелә - ашлык беләнме, печән беләнме, акчалатамы. Татарстанда печән белән генә дә, ашлыклата да, акча гына түләүчеләр дә бар. Җирдән намуссыз файдаланучыларны мәҗбүри түләтә алмасак та, йогынты ясарга хакыбыз бар”, - диде Илдус Габдрахманов.

#авыл хуҗалыгы #Марат Әхмәтов #Илдус Габдрахманов

Сәхифәләр

Татарстанда пай җирләре өчен түләү ел ахырына кадәр дәвам итә