Татарстанда электр энергиясе һәм су белән тәэмин итүчеләрнең кереме кимегән
Сәбәбе — кайбер предприятиеләрдә эш тукталып тору белән бәйле.
(Казан, 7 июль, «Татар-информ», Зилә Мөбәрәкшина). Коронавирус вакытында Татарстанда электр энергиясе һәм су белән тәэмин итүчеләр табышның кимүен белдергән. Бу хакта Татарстанның Төзелеш, архитектура һәм торак-коммуналь хуҗалык министрының беренче урынбасары Алексей Фролов ТР Хөкүмәте Йортында коммуналь хезмәтләргә тарифларны үзгәртү мәсьәләсенә багышланган брифингта сөйләде.
«Энергия чыганакларын куллану күләмен киметү проблемасы бар. Беренче чиратта, ул электр энергиясе һәм су белән бәйле. Әлеге мәсьәләне без аерым карарбыз. Тәэмин итүчеләрнең табышларын югалту күрсәткечен ел ахырына кадәр төгәл билгеләргә мөмкин булачак. Компенсация чаралары киләсе елда каралачак», — диде Алексей Фролов.