Татарстанда 4,2 миллион тоннага якын ашлык суктырылган
Уңыш гектарыннан уртача 29,9 центнер тәшкил итә.
(Казан, 14 сентябрь, «Татар-информ»). Татарстанда урып-җыю эшләре башланганнан алып 4,2 миллион тоннага якын ашлык суктырылган, уңыш гектарыннан уртача 29,9 центнер тәшкил итә. Бүген ТР Премьер-министры урынбасары – авыл хуҗалыгы һәм азык-төлек министры Марат Әхмәтов республика Хөкүмәте йортында узган киңәшмәдә шул хакта хәбәр итте.
Татарстанның барлык районнары белән видеоконференцэлемтә режимындагы киңәшмәне ТР Премьер-министры Алексей Песошин үткәрде.
Республикада сезонлы кыр эшләренең барышы хакында сөйләгәндә, Марат Әхмәтов уңайлы һава шартлары бу атнада бөртеклеләрне шактый зур мәйданда урып-җыярга мөмкинлек бирүен искәртте. Республикада әлеге культураларны (бөртеккә дигән кукурузны исәпкә алмыйча) тагын 15 мең гектардан җыеп аласы калган. Бу бөртеклеләр биләгән мәйданнарның 1 проценты (1 миллион 420,9 мең гектар) дигән сүз.
ТР Авыл хуҗалыгы һәм азык-төлек министрлыгы мәгълүматларыннан күренгәнчә, 13 сентябрьгә республикада 4 миллион 165 мең тонна ашлык суктырылган. Бу узган елның шул чоры белән чагыштырганда 523,7 мең тоннага артыграк.