Татарстан Рәисе яшеренү урыннарын тиешле хәлгә китерүне контрольдә тотарга кушты
Татарстанның Дәүләт торак инспекциясе идарәче компанияләрнең яшеренү урыннарын тиешле хәлгә китерү эшләрен контрольдә тотарга тиеш. Бу хакта традицион республика киңәшмәсендә ТР Рәисе Рөстәм Миңнеханов белдерде, дип хәбәр итә төбәк җитәкчесенең матбугат хезмәте.
Киңәшмә республиканың барлык муниципалитетлары белән видео-конференц-элемтә режимында узды. Аның эшендә Татарстан Премьер-министры Алексей Песошин һәм ТР Дәүләт Советы Рәисе вазифаларын башкаручы Марат Әхмәтов катнашты.
Моннан тыш, Дәүләт торак инспекциясе күпфатирлы йортлардагы яшеренү урыннарын тикшерү эшен дәвам итәргә тиеш. «Куелган бурычка җаваплылык белән карауны таләп итәм», - дип ассызыклады ТР Рәисе.
Рөстәм Миңнеханов сүзләренчә, татарстанлылардан яшеренү урыны дип билгеләнгән урыннарның канәгатьләнерлек хәлдә булмавы, аларның кайда булуы турында мәгълүмат булмау, подвал биналарының файдаланыла алмавы, шулай ук башка охшаш проблемалар турында шикаятьләр килә.
Әлеге вакытка республиканың 396 күпфатирлы йортында яшеренү урыннарын тикшергәндә аларның кайберләрендә чыннан да җитешсезлекләр булуы ачыкланган. Моннан тыш, аерым сәнәгать объектларында пилотсыз очкыч яки ракета һөҗүме куркынычы булган очракта гамәлләр алгоритмы эшләнмәгән.
Моннан тыш, Татарстан Рәисе ракета һәм пилотсыз очкыч һөҗүмнәре куркынычын исәпкә алып, иминлек мәсьәләләре буенча халык белән эшне көчәйтергә кушты. «Гамәлләр алгоритмы барлык муниципалитетларга, предприятиеләргә һәм оешмаларга җиткерелде. Аны тайпылышсыз үтәүне тәэмин итәргә кирәк», - диде ул.