Мәскәү татарлары Фәнис Яруллинны искә алу кичәсендә татарча диктант язачак

Быел февраль аенда халык шагыйренә 80 яшь тулган булыр иде.
(Казан, 20 март, "Татар-информ"). 24 март көнне Мәскәүнең Татар милли үзәгендә Татарстанның халык шагыйре Фәнис Яруллинны искә алу чаралары уза. Исән булса, аңа 9 февральдә 80 яшь тулган булыр иде. 
Бу хакта Татарстан Республикасының Россия Федерациясендәге Тулы вәкаләтле вәкиллеге хәбәр итә. 
 
Сәгать 11.00-12.30 да үзәккә килүчеләр татарча диктант язачак. Аны филология фәннәре кандидаты, татар теле курслары җитәкчесе Лилиана Сафина үткәрәчәк. 
 
Сәгать 13.00-14.00 дә китап күргәзмәсе эшләячәк. 
 
Сәгать 14.00-16.00 дә Фәнис Яруллинның иҗатына багышланган әдәби-музыкаль композиция тәкъдим ителәчәк. 
 
Чарада Татарстанның атказанган артисты Гөлнара Тимерҗанова катнашыр дип көтелә.