Рәмис Сафин Ульяновск шәһәренең "Иң яхшы кешеләр - 2019" исемлегенә керде

Шәһәрнең Мактау тактасындагы утыз кеше арасында дүрт татар кешесенең исеме булачак.

(Казан, 2 сентябрь, «Татар-информ»). Ульяновскида яшәүче 30 кеше «Шәһәрнең иң яхшы кешеләре-2019» исемлегенә кергән. Мэрия комиссиясе раслаган исемлектә Ульяновск өлкә татар милли-мәдәни автономиясе рәисе, Ульяновск шәһәре Иҗтимагый палатасы әгъзасы Рәмис Сафин да бар. Бу хакта Бөтендөнья татар конгрессы матбугат хезмәте хәбәр итә.

Аларның исемнәре һәм портретлары тиздән шәһәрнең Мактау тактасында урын алачак.

Ульяновск шәһәренең иң яхшы кешеләре арасында тагын берничә татар милләте вәкилләре дә бар. Болар - «Стройзаказчик» муниципаль бюджет учреждениесенең административ-хуҗалык бүлеге башлыгы Илдар Мохтаров, «Волга» кунакханәсе генераль директоры Гөлнара Нуретдинова, «Симбирцит» муниципаль бюджет учреждениесе директоры урынбасары Шамилә Шәрәфетдинова – әнә шундыйлардан.