Татарстанда кинотеатрларны ачу планлаштырылмаган
Хәзерге вакытта республика коронавирус инфекциясе пандемиясе белән бәйле чикләү чараларын бетерүнең икенче этабында тора.
(Казан, 25 июль, «Татар-информ», Марат Ишкильдин). Татарстанда әлегә биналарда кинотеатрлар ачарга планлаштырылмый. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның Татарстан буенча идарәсе җитәкчесе урынбасары Любовь Авдонина сөйләде.
«Бүген без икенче этапта торабыз, һәм биналарда кинотеатрлар ачу турында сүз бармый. Алар әлегә ябык», — диде Авдонина.
Татарстанда өченче этапка күчү йоктырылган Covid-19 таралу коэффициенты күрсәткече 0,5 процентка җиткәч булачак. Бүгенге көнгә Татарстан Республикасында ул 100 мең кешегә 0,8-0,9 процент тәшкил итә.
Искәртәбез, 15 июльдән Татарстанда сәүдә үзәкләре һәм җәмәгать туклануы объектлары эшен яңадан башлап җибәрде.