Рөстәм Миңнеханов карантинда утыручыларга теләктәшлек белдереп, флешмобка кушылды

Акциядә катнашучылар социаль челтәрләрдәге үз сәхифәләрендә кешеләргә иминлек теләп, фотолар урнаштыра.

(Казан, 20 март, «Татар-информ»). Татарстан Президенты Рөстәм Миңнеханов социаль челтәрләрдә оештырылган, Covid-19 коронавирусы аркасында карантинда утыручы кешеләргә иминлек теләгән флешмобка кушылды.

ТР Президенты Instagram социаль челтәрендә үз фотосын урнаштырды һәм аның астына, #воВсе32 һәм #всемирныйденьсчастья хэштегларын кулланып, «Барысы да яхшы булачак!» дигән сүзләр язды.

Татарстан халкы бүген билгеләп үтелә торган Бөтендөнья бәхет көнендә чит илләрдән кайткан һәм карантинда утырырга мәҗбүр булган кешеләргә (республикада аларның саны – 1 меңгә якын) теләктәшлек күрсәтү өчен флешмоб оештырды.

Акциядә катнашучылар социаль челтәрләрдәге үз сәхифәләрендә теләктәшлек сүзләре һәм #воВсе32, #мечтайсомной һәм #всебудетхорошо хештеглары белән фотолар урнаштыра. Флешмобның максаты – коронавирус аркасында карантин узучыларга һәм бер-береңә елмаю бүләк итү.

«Татар-информ» агентлыгы хәбәр иткәнчә, әлеге акциянең инициаторы – «Минем белән бергә хыяллан» Бөтенроссия хәйрия проекты. Акцияне агентлык редакциясе дә хуплады.

Флешмобка татарстанлылар гына түгел, Россиянең башка төбәкләрендә яшәүчеләр дә кушыла. Акцияне оештыручылар фикеренчә, елмаю кешеләрне берләштерергә һәм кыен чакларда да аларны бәхетлерәк итәргә сәләтле.