Татарстанда 10 инвалид кеше үз эшен башлап җибәргән

Мөмкинлекләре чикле кешеләр баш киемнәре тегә, йорт җиһазлары ясый, юридик консультацияләр бирә.

(Казан, 1 декабрь, «Татар-информ», Гадел Әхмәтҗанов). Агымдагы елда республикада 10 инвалид шәхси эшмәкәр булып теркәлгән. Бу турыда «Татар-информ»да узган матбугат очрашуында ТР хезмәт, мәшгульлек һәм социаль яклау министры Эльмира Зарипова хәбәр итте.

«Быел 10 мөмкинлеге чикләнгән кеше үз эшен башлап җибәрде. Алар арасында юридик консультацияләр бирүчеләр, баш киемнәре тегүчеләр, савыт-саба сатучылар, йорт җиһазлары, табигый тиредән эшләнмәләр ясаучылар да бар», — дип сөйләде министр.

Исегезгә төшерәбез, быел Татарстанда 25 меңнән артык инвалид кеше эш белән тәэмин ителгән.