Рамил Мирзаһитов полилингваль укытучылар җитмәгән районнарны атады

Югары мәктәп деканы абитуриентның биш ел дәвамында килешү төзелгән мәктәптә эшләргә тиешлеген әйтте.

(Казан, 25 март, «Татар-информ», Зилә Мөбәрәкшина). КФУның Габдулла Тукай исемендәге Милли мәдәният һәм мәгариф югары мәктәбе деканы Рамил Мирзаһитов билингваль һәм полилингваль белгечләренең кайсы районнарга җитмәгәнлеген әйтте. Бу хакта ул «Татар-информ» агентлыгында узган матбугат очрашуында сөйләде.

«Узган ел билингваль һәм полилингваль юнәлешләрендә белем алучылар Татарстанның 29 районыннан килде. Быел утыздан артык районнан килгәннәр иде. Шушы юнәлешләрдә хәтта чит республикаларыннан да укучылар бар. Шунысы гына бар: алар килешүне Татарстан мәктәпләре белән төзергә тиеш. Башкортстан районнары, Ижау, Яр Чаллы, Түбән Кама шәһәрләре, Әгерҗе, Актаныш районыннан килүчеләр бар», — диде ул.

Декан билингваль һәм полилингваль юнәлешләргә укырга керүче абитуриентлар КФУга килгәнче үк Татарстан Мәгариф һәм фән министрлыгының исемлекләр бирүен, барысының да теге яки бу мәгариф оешмалары белән килешүләре төзелгән булуын аңлатты. «Дүрт яклы килешүгә абитуриент, мәктәп һәм университет җитәкчелеге, ата-ана кул куя», — дип җавап бирде ул «Татар-информ» хәбәрчесенә.

«Шушы нигездә, укып бетергәннән соң, студент кимендә биш ел нәкъ шушы мәктәпкә кайтып эшләргә тиеш. Шуңа күрә бу очракта бернинди дә куркырлык урын юк, аларның кайтып эшләрлек урыннары бар», — диде хәбәрчегә Рамил Мирзаһитов.