Рөстәм Миңнеханов Белгородка һөҗүм вакытында үлүчеләрнең гаиләсенең кайгысын уртаклашты
Скопировать ссылку
Татарстан Рәисе Рөстәм Миңнеханов Белгород шәһәренә Украина ягыннан ракета һөҗүме вакытында һәлак булучыларның гаиләсенең кайгысын уртаклашты. Бу турыда «Татар-информ»га республика җитәкчесенең матбугат хезмәте хәбәр итте.
«Шәхсән үзем һәм Татарстан Республикасында яшәүче бар халык исеменнән мәрхүмнәрнең туганнарының һәм якыннарының кайгысын уртаклашам. Зыян күрүчеләргә тизрәк сәламәтләнү телим», – дигән Рөстәм Миңнеханов.
Моңа кадәр Гадәттән тыш хәлләр министрлыгына сылтама белән хәбәр ителгәнчә, Украина Кораллы көчләре Белгород шәһәре үзәгенә һөҗүм иткәндә 10 кеше һәлак булган. Алар арасында 1 бала бар. 45 кеше, шул исәптән 4 бала зыян күргән.