Камил хәзрәт Сәмигуллин татарча Коръән тәфсире халык алдында әзерләнүен әйтте

Коръән тәфсирен әзерләгәндә Россия мөселманнары Диния нәзарәтеннән кисәтүләр һәм тәкъдимнәр килмәгән.

(Казан, 9 апрель, «Татар-информ»). Коръән тәфсирен әзерләү турында сөйләшү халык алдында алып барылды. Әлеге хезмәт шул исәптән Россия мөселманнары Диния нәзарәте вәкилләре өчен дә тәкъдим ителде. Алардан кисәтүләр һәм тәкъдимнәр килмәде. Бу хакта «Татар-информ» мәгълүмат агентлыгына интервьюда Татарстан мөселманнары Диния нәзарәте рәисе Камил хәзрәт Сәмигуллин «Кәлам Шәриф. Мәгънәви тәрҗемә» хезмәте тирәсендәге гаугага аңлатма бирде.

«Равил хәзрәтнең Коръән тәрҗемәсе түгел, ә аятьләрнең берсенә сылтама ачуын чыгарган. Сүз уңаеннан, тәфсир халык алдында әзерләнде. Эшлекле презентацияләр үткәрелде, шул исәптән, Татарстан Республикасының Мәскәүдәге вәкиллегендә дә, анда Россия мөселманнары Диния нәзарәте вәкилләре дә катнашты. Алардан кисәтүләр һәм тәкъдимнәр килмәде», — дип хәбәр итте Камил Сәмигуллин.

Мәгълүм булганча, массакүләм мәгълүмат чараларында ТР мөселманнары съезды алдыннан мөфти Равил Гайнетдин Татарстан Президенты Рөстәм Миңнехановка республика мөселманнары Диния нәзарәте башлыгы адресына дәгъва белдереп язган хаты бастырылган иде. Россия мөфтие Коръән тәфсирендә хата җибәрүдә Камил Сәмигуллинны гаепләде.

Камил Сәмигуллин сүзләренчә, «Кәлам Шәриф. Мәгънәви тәрҗемә» — Татарстан мөселманнары Диния нәзарәте тарихында беренче тапкыр нәшер ителгән Коръән тәфсире, ул төрле белгечләрнең 7 еллык күмәк эше нәтиҗәсе.

«Коръән мәгънәсен тәрҗемә итүне без татар һәм иске татар телләрендә, шулай ук гарәп һәм төрек телләрендәге тәфсирләрга таянып әзерләдек. Бу ислам әдәбиятының күренекле хезмәтләре! Моннан тыш, эш барышында безнең белгечләр хәзер тәфсир язучы татар язучылары тәҗрибәсенә мөрәҗәгать итте», — дип хәбәр итте Татарстан мөфтие.

«Кемдер тагын бер татар тәфсире ни өчен кирәк булды дип сорар? Революциягә кадәр чыгарылган татар тәфсирләрендә проблема юк. Әмма хәзерге татарларның иске татар телен аңлауда проблема бар. Шуңа күрә Коръәнне заманча татар телендә хаталарсыз тәрҗемә итү ихтыяҗы бар иде», — диде Камил Сәмигуллин.

«Һәм Аллага шөкер, тәрҗемә текстында хаталар юк. Әлбир хәзрәт Крганов, Нәфигулла хәзрәт Аширов, Вәлиәхмәт хәзрәт Гаязов, Ставрополь крае мөселманнары Диния нәзарәте һәм Кырым мөселманнары Диния нәзарәте һ.б. басмага уңай бәяләмә бирде», — диде Татарстан мөфтие.