Камил хәзрәт Сәмигуллин Равил хәзрәт Гайнетдин тараткан хатка үз аңлатмасын бирде

Равил хәзрәт Гайнетдин Россиядәге барлык мөселманнар исеменнән сөйләү хокукын «хосусыйлаштырырга» тырыша, дип белдерде Татарстан мөфтие.

(Казан, 9 апрель, «Татар-информ»). Равил хәзрәт Гайнетдин Россиядәге барлык мөселманнар исеменнән сөйләү хокукын «хосусыйлаштырырга» тырыша. Россия мөфтиенең сектантлыкта гаепләп язган хатына республика мөфтие Камил Сәмигуллин шулай дип «Татар-информ»га аңлатма бирде.

Мондый гаепләүләр язылган хат бастыруның сәбәпләре турында Камил Сәмигуллин: «Чын уй-ниятләрен фаразлыйсым килми, ләкин съезд алдыннан очраклы гына пәйда булуы икеле (ТР мөселманнары Диния нәзарәте съезды 12 апрельдә узачак). Равил хәзрәт, образлы итеп әйтсәк, Россиянең барлык мөселманнары исеменнән сөйләү хокукын „хосусыйлаштырырга“ тырыша, ләкин бу бүгенге көннең чынбарлыгын чагылдырмый», — дип җавап бирде.

ТР Диния нәзарәте рәисе хат турында массакүләм мәгълүмат чараларыннан укып белүен әйтте. «Сүз уңаеннан, хат Татарстан Президенты Аппаратына рәсми рәвештә кергәнче һәм Россия мөселманнары Диния нәзарәте сайтында басылып чыкканчы ук таралды һәм бу да нәрсәдер турында сөйли», — диде Татарстан мөфтие. 

Камил Сәмигуллин искәрткәнчә, дүшәмбе көнне съездда ул Татарстан мөселманнары Диния нәзарәте җитәкчесе вазифасында дүрт ел эшчәнлеге турында доклад белән чыгыш ясаячак. Мөселман өммәтендәге эшләрнең торышы белән кызыксынучылар докладны мөфтият сайтында карый алачак.

«Шулай булгач, хатны язуның чын сәбәпләрен Аллаһ кына белә. Ә Равил хәзрәткә сәламәтлек һәм яхшы Рамазан ае телим!» — дип йомгаклады сүзен ТР Диния нәзарәте рәисе.