Быел ифтарларда катнашучылар саны йөздән артмаска тиеш

Республика ифтары 7 май көнне «Казан Экспо»да узачак.

(Казан, 6 апрель, «Татар-информ», Гадел Әхмәтҗанов). Агымдагы елда Рамазан аенда республика мәчетләрендә узучы ифтарларда катнашучылар саны йөздән күбрәк булмаска тиеш.

«Быел республикабыз мәчетләрендә ифтарлар уздырырга мөмкин. Әмма мәҗлестәге кешеләр саны йөздән артмаска тиеш. Һәр кешегә 4 квадрат метр урын булуы мөһим. Ифтарларга килергә теләүчеләрнең медицина битлегеннән булулары зарур», — диде Татарстан мөфтиенең рәсми органнар белән эшләү буенча урынбасары Илфар хәзрәт Хәсәнов «Татар-информ»да узган матбугат очрашуында.

Республика ифтары 7 май көнне «Казан Экспо» халыкара күргәзмәләр үзәгендә узачак. Анда катнашучыларның йөздән күбрәк булуы көтелә.

«Казан Экспо»ның мәйданы зур, бүлмәләре күп, шунлыктан анда күбрәк кеше җыела ала. Барлык саклык чаралары күреләчәк», — диде спикер.

Элегрәк «Татар-информ» быелгы тәравих намазларының санитар-эпидемиологик вазгыятьне күз уңында тотып узачагын язган иде.