Рөстәм Миңнеханов Татарстан халкына: Татар булуыгыз белән горурланып яшәгез
Татарстан Президенты «Тәртип» радиосының туры эфирыннан халыкка теләкләрен җиткерде.
(Казан, 7 май, «Татар-информ», Зилә Мөбәрәкшина). Татарстан Президенты Рөстәм Миңнеханов «Тәртип» радиосы эфирында республика халкына республиканы хөрмәт итеп һәм «татар булуыбыз белән горурланып яшик» дигән теләкләрен яңгыратты.
«Татар булуыгыз белән горурланып, олыларга ихтирам күрсәтеп, балаларны яратып яшәгез. Республикабызны, Россия хөкүмәтен хөрмәтлик. Менә шундый юнәлештә яшәсәк, Татарстаныбыз гөрләп торыр. „Татарстанда яшәр идем!“ — дип хыялланган кешеләр күбрәк булсын иде», — диде ул.
Рөстәм Миңнеханов республика халкына исәнлек-саулык теләде. «Үзегезне саклагыз. Пандемиядән саклану өчен барлык шартлар бар: санитар-эпидемиологик таләпләрне үтәсәгез яхшы булыр. Вакцина да кадатырга мөмкин», — диде Президент.