Рөстәм Миңнеханов Путинга коронавирустан дәвалаучы табибларга түләү хакында сөйләде
Татарстанда коронавирус белән авыручы пациентларны дәвалау өчен 26 дәвалау оешмасында 2577 урын әзерләнгән.
(Казан, 20 май, «Татар-информ»). Татарстанда 6 меңнән артык медицина хезмәткәре Covid-19 коронавирусы белән авыручы пациентлар белән эшләгән өчен өстәмә түләүләр алды. Бу хакта Татарстан Президенты Рөстәм Миңнеханов дәүләт башлыгы Владимир Путин белән видеоконференция режимында очрашуда хәбәр итте.
«Сезнең йөкләмә буенча, 6048 медицина хезмәткәре өстәмә түләүләр алды. Апрель өчен барлыгы 179 миллион сум түләнде. Бу карар өчен безнең медицина хезмәткәрләреннән рәхмәт сүзләрен белдерәм», — диде Рөстәм Миңнеханов.
Татарстан Президенты республикада коронавирус белән авыручы пациентларны дәвалау өчен урыннар әзерләнгәнен әйтте.
«26 дәвалау оешмасында 2577 урын әзерләнгән. Бүген урыннарның 31 процентында авырулар бар. Медицина оешмалары җиһаз, дару һәм шәхси саклану чаралары белән тәэмин ителгән», — диде Рөстәм Миңнеханов.
Татарстан Президенты Рөстәм Миңнеханов бүген дәүләт башлыгы Владимир Путин белән видеоконференция режимында очрашты.