Рәдиф Гаташ алтмышынчы елларда яшь шагыйрьләргә Бикә Рәхимова канат куйды дип саный
Равил Фәйзуллин, Ренат Харис, мин, Рөстәм Мингалимгә генә түгел, Разил Вәлиев, Зөлфәт, Мөдәррис Әгъләмнәргә – барысына да канат куйды, ди шагыйрь.
(Казан, 8 апрель, “Татар-информ”, Зилә Мөбәрәкшина). Татарстанның халык шагыйре Рәдиф Гаташ танылган шагыйрә һәм публицист Бикә Рәхимова алтмышынчы елларда татар әдәбиятына килгән яшь буын шагыйрьләренә канат куйды, аларга ярдәм итте дип саный. Бу хакта ул Бикә Рәхимованы искә алу кичәсендә “Татар-информ” хәбәрчесенә сөйләде.
“Безнең буын шагыйрьләренә – Равил Фәйзуллин, Ренат Харис, Гәрәй Рәхим, мин, Рөстәм Мингалимгә генә түгел, Разил Вәлиев, Зөлфәт, Мөдәррис Әгъләмнәргә – барысына да канат куйды, күңел җылысын бирде дип ышанып әйтә алам”, - диде Рәдиф Гаташ.
“Мин Бикә Рәхимова турында уйлаганда, беренче чиратта, аның искиткеч хуҗабикә булуын хәтерлим. Алтмышынчы елларда әдәбиятка килгән вакытта безнең буын Равил Фәйзуллинның кечкенә фатирында берләште. Уңган, якты күңелле хуҗабикә безне дуслаштырды, безгә искиткеч табын әзерләде”, - дип искә алды ул.