«Микулай» фильмы Казан кинофестиваленең «Этник кино» программасында күрсәтеләчәк
Илшат Рәхимбайның «Микулай» фильмы Казан кинофестиваленең «Этник кино: үсеш ноктасы» конкурстан тыш программасында күрсәтеләчәк.
«Казан халыкара мөселман киносы фестиваленең конкурстан тыш «Төрки дөнья» һәм «Этник кино: үсеш ноктасы» программалары әзер. «Төрки дөнья» программасына төрки халыкларның 10 кинематография үрнәге, «Этник кино: үсеш ноктасы» программасына дөнья халыкларының традицияләре турында сөйләүче 9 фильм кергән», дип хәбәр итә кинофестивальнең матбугат үзәге.
Сайлап алу комиссиясе тамашачы өчен кызыклы һәм үзенчәлекле кинофильмнар сайлаган, диелгән хәбәрдә.
«Төрки дөнья» программасына кергән эшләрнең дүртесен Россия кинорежиссерлары төшергән, калганнары – Казахстан, Төркия, Үзбәкстан һәм Кыргызстан кинематографистларының иҗаты. Светлана Слапке (Германия) билгеләп үткәнчә, быел бу программада тарихи эшләр юк, иҗатчылар заманның актуаль проблемалары турында уйлана.
«Этник кино: үсеш ноктасы» программасын танылган кино белгече Сергей Анашкин төзегән. Ул Россиянең милли регионнарында төшерелгән фильмнардан тора. Программага Удмуртия, Якутия, Марий Эл, Башкортостан һәм Татарстан кинематографистларының эшләре сайлап алынган.
- Казан халыкара мөселман киносы фестивале 5-9 сентябрь көннәрендә Казанда узачак.
- «Татар-информ» фильмның, Илшат Рәхимбай кинофестивальгә катнашу өчен гариза бирсә дә, конкурс программасына кертелмәве турында язган иде.