Марат Әхмәтов Тукай районындагы алдынгы комбайнчыларны бүләкләде
Бүләккә урып-җыюда югары күрсәткечләргә ирешкән игенчеләр лаек булган.
(Казан, 16 август, “Татар-информ”). Татарстан авыл хуҗалыгы һәм азык-төлек министры Марат Әхмәтов эшлекле сәфәр барышында Тукай районының алдынгы комбайнчыларын бүләкләгән. Бу хакта Татарстан Авыл хуҗалыгы һәм азык-төлек министрлыгы матбугат хезмәте хәбәр итә.
Бүләкләрне “Кама” агрофирмасы механизаторлары Гөлүс Галиев һәм Илнур Этикбаев алган. “Нью-Холланд” комбайнында икенче “җидекөнлектә” алар 302 тонна бөртек суктырган. Бүләкләнүчеләр арасында булган Галимҗан Абдуллин “Нью-Холланд” комбайнында 211 тонна уңыш җыйган. Йөк машинасында Илһам Гыйльметдинов ындыр табагына 320 тонна ашлык кайтарган.
Премияләрне башка хуҗалык алдынгылары да алган. Болар - Динар Шәйхаттаров һәм Рәфыйк Сәләхов “Ярыш”, Ринат Гатиятуллин, Владимир Хоритонцев “Вилданов”, Александр Коршунов һәм Юрий Абызов "Р-Арго”, ә Ирек Димөхәммәтов белән Флорид Җиһангиров "Гигант” хуҗалыкларыннан.