Марат Әхмәтов Татарстан Дәүләт Советында эш өстенлекләрен атады
Татарстан Дәүләт Советы Рәисе урынбасары элегрәк республиканың авыл хуҗалыгы һәм азык-төлек министры вазифасын башкарган иде.
(Казан, 20 сентябрь, «Татар-информ», Ксения Перепеченова). Алтынчы чакырылыш Татарстан Дәүләт Советы Рәисе урынбасары Марат Әхмәтов Татарстандагы авыл халкының эш белән тәэмин ителеше һәм активлыгы мәсьәләләре белән шөгыльләнергә планлаштыра. Бу хакта ул Татарстан парламентының беренче утырышыннан соң «Татар-информ» мәгълүмат агентлыгы корреспондентына сөйләде.
«Татарстан Республикасы Президентының авыл халкының эшлекле активлыгы, фермер хәрәкәте, кооперативлар, шәхси ярдәмче хуҗалык, халыкның мәшгульлеге буенча күрсәтмәсе (мин әле министрлыкта эшләгән вакытта ул бурыч Фәрит Хәйрулла улына йөкләнгән иде) булган иде. Бу юнәлеш тә күпчелек очракта миндә булыр, күрәсең. Әлегә якынча офыклар шундый», - диде ул.
Марат Әхмәтов Татарстан Дәүләт Советы комитетлары һәм депутатлары белән тыгыз бәйләнешне җайга салу икенче мөһим бурыч дип саный. Искәртәбез, бүген яңа чакырылыш Татарстан парламентының беренче сессиясе узды.