Марат Әхмәтов Җиңү көненә төп чәчү эшләрен төгәлләргә җыенган районнарны атады
Нурлат, Аксубай, Алексеевск районнары иртә чәчелә торган культураларны чәчеп бетерү алдында тора.
(Казан, 7 май, “Татар-информ”, Гөлнар Гарифуллина). 9 Майга республикадагы берничә район төп чәчү эшләрен төгәлләргә ниятли. Бу Нурлат, Аксубай, Алексеевск районнары. Бу хакта ТР Министрлар Кабинетында брифингта ТР вице-премьеры – авыл хуҗалыгы һәм азык-төлек министры Марат Әхмәтов әйтте.
“Республикада климатик зоналар төрле булганлыктан, чәчү кампаниясе темпы да төрле. Дым каплатуга, иртә чәчүгә беренче булып керешүчеләр чәчү эшләренең ахырына якынлашып килә. 9 Майга берничә район иртә чәчелә торган культураларны чәчеп бетерү алдында. Ә ике фазада чәчелә торган культуралар – рапс, көнбагышны чәчү Җиңү бәйрәменнән соң да берничә көн дәвам итәчәк”, - диде Марат Әхмәтов.
“Республика районнарында 10 майга төп чәчү эшләрен төгәлләү бурычы куелган”, - диде министр.
Ул чәчү эшләренә барлыгы 25 млрд сум тирәсе чыгым тотылачагын, 11 млрд сумы кредит ресурслары булуын әйтте. “5,5 млрд сумын язгы кыр эшләре башланганчы ук бирдек”, - диде Әхмәтов.
Бүген Татарстанда барлык мәйданнарның яртысыннан артыгы – 900 мең гектарга якын җир чәчелгән. Чәчүлек мәйданы 2,8 млн гектар тәшкил итә, шул исәптән сабан мәйданнары – 1,7 млн га.