Марат Әхмәтов: 2018 елда авыл хуҗалыгы тулаем продукциясе 224 млрд сум тәшкил итәчәк
Узган өч елда крестьян-фермерлык хуҗалыклары буенча тулаем продукция күләме яхшы үсеш күрсәтте, ел саен - 10 проценттан артык, диде министр.
(Казан, 22 декабрь, «Татар-информ»). 2018 елда авыл хуҗалыгы тулаем продукциясе күләме 224 млрд сум тәшкил итәчәк дип көтелә. Бүген Татарстан Хөкүмәте Йортында киңәшмәдә Татарстан Премьер-министры урынбасары - авыл хуҗалыгы һәм азык-төлек министры Марат Әхмәтов шул турыда әйтте. Бу хакта Татарстан Президенты матбугат хезмәте хәбәр итә.
Авыл хуҗалыгы берләшмәләрендә тулаем продукциясе күләме 106 млрд сум, шәхси ярдәмче хуҗалыкларда 98 млрд, крестьян хуҗалыкларында 20 млрд сум булыр дип көтелә, диде Әхмәтов.
"Узган өч елда крестьян-фермерлык хуҗалыклары буенча тулаем продукция күләме яхшы үсеш күрсәтте, ел саен 10 проценттан артык", - диде министр.
Республиканың барлык районнары белән киңәшмәне видеоконференцэлемтә режимында Татарстан Президенты Рөстәм Миңнеханов үткәрде.