Хәвеф-хәтәр 22 декабрь 2024 09:34

Коткаручылар Камчаткада югалган Ан-2 самолётын тапкан

Скопировать ссылку

Камчаткада өч көн элек югалган Ан-2 самолеты табылган, аның бортында булган кешеләрнең барысы да исән калган. Бу хакта гадәттән тыш хәлләр буенча төбәк министры Сергей Лебедев хәбәр итте. Пилотлар һәм пассажир Мильково авылына эвакуацияләнгән, аннан медицина учреждениесенә җибәреләчәк.

Росавиациядә белдерүләренчә, һава судносы Мәскәү вакыты белән иртәнге сәгать 05.00 тирәсендә Тундровая тавы янында, барып җитүе кыен булган кар баскан зонада табылган. Эзләүгә МИ-8 вертолетын җәлеп иттеләр, ул катастрофа булырга ихтимал урынга юнәлгән.

Коммерция йөкләре белән оча торган Ан-2 самолеты 19 декабрьдә көндез бәла килүе турында сигнал биргән, шуннан соң аның белән элемтә өзелгән. Коткару маягыннан сигнал 20 декабрьдә теркәлгән, ләкин эзләү уңайсыз һава шартлары аркасында катлаулана. Һәлакәткә бәйле рәвештә, очышларның иминлек кагыйдәләрен бозу турындагы маддә буенча җинаять эше кузгатылган.

Авария килеп чыгуның якынча сәбәбе - самолетның бозлануы, нәтиҗәдә ул җиргә төшкәндә әйләнеп капланган.

Сәхифәләр

Коткаручылар Камчаткада югалган Ан-2 самолётын тапкан