Композитор Эльмира Галимова концертында Сабантуй бәйрәме гимны яңгыраячак
Композитор, сәнгать фәннәре кандидаты, Россия һәм Татарстан Композиторлар берлеге әгъзасы Эльмира Галимова татар халкының тарихи вакыйгалары һәм эпосларына нигезләнгән, «Йөрәккә якын әсәрләр» дип исемләнгән концертын тәкъдим итү конференциясендә Сабантуй бәйрәменең гимны – «Татар рухы Сабантуй» җырының иҗат ителү тарихы турында сөйләде.
«Татар халкының милли бәйрәме Сабантуй гимны Бөтендөнья татар конгрессы заказы буенча язылды. Бу – Татарстан Республикасы Рәисе тарафыннан бирелгән йөкләмә. Әлеге җыр белән без бүгенге концерт программасын төгәлләячәкбез. Гимн «Татар рухы Сабантуй» дип атала, концертта аны Татарстан республикасының атказанган артисты Айрат Ганиев башкарачак», – дип сөйләде Эльмира Галимова.
Автор әйтүенчә, гимн бик үзенчәлекле, төрле форматта яңгырауга яраклаштырып иҗат ителгән.
«Мин аны бик үзенчәлекле форматта иҗат иттем – ул эстрада форматында да, зур стадионнарда да, симфоник оркестр белән дә яңгырый ала. Безнең бурыч – төрле мәйданчыкларда яңгырарлык әсәр булдыру иде һәм без үз максатыбызга ирештек дип уйлыйм. «Татар рухы Сабантуй» җыры федераль Сабан туенда яңгырады, премьера булды, ә концертта без аның оркестр версиясен ишетәчәкбез», – диде композитор.
Фото: © «Татар-информ» Солтан Исхаков