Киров эшмәкәре Равил Нургалиев: XV Бөтенроссия авыл Сабан туе безгә зур мирас калдырды
Киров өлкәсе татарлары конгрессы рәисе, «Молот-Оружие» җаваплылыгы чикләнгән җәмгыяте генераль директоры Равил Нургалиев 2025 елда Киров өлкәсе Нократ Аланы шәһәрендә узган XV Бөтенроссия авыл Сабан туе нәтиҗәләре турында сөйләде. Ул әлеге чараны оештыруда ярдәм күрсәткән өчен Татарстан Рәисе Рөстәм Миңнехановка рәхмәт белдерде. Бу хакта ул бүген Казанда узган «Татарстанның эшлекле хезмәттәшләре» XVIII форумының пленар утырышында сөйләде.
«Быел XV Бөтенроссия авыл Сабан туе Киров өлкәсе Нократ Аланы шәһәрендә узды. РөстәмМиңнехановка Сабантуйны үткәрүдә күрсәткән ышанычы, финанс ярдәме һәм кыйммәтле бүләкләр өчен рәхмәт белдерәм – бу микроавтобус һәм яңа төзелгән татар ихатасы. Без дә читтә калмадык, мин шәхсән үзем Киров өлкәсенең җиде мәктәбенә балаларга милли киемнәр алу өчен акча бүлеп бирдем. Бик җитди эш башкарылды, нәтиҗәдә якты милләтара бәйрәм узды. Безнең шәһәр өчен Сабантуй бик зур мирас калдырды. Мондый зур чарага шәһәр төзекләндерелде – юллар, тротуарлар, социаль инфраструктура ремонтланды», – диде ул.
Равил Нургалиев әлеге масштаблы чарага Россиянең 70 төбәгеннән кунаклар җыелуын искәртте.
«Киров өлкәсендә 1 миллионнан артык халык яши, аларның 40 меңе – татарлар. Сабантуйга илебезнең 70 төбәгеннән кунаклар килде. Бәйрәмдә Киров өлкәсе губернаторы Александр Соколов, Татарстан Республикасы Рәисе Рөстәм Минниханов һәм Пенза өлкәсе губернаторы Олег Мельниченко катнашты, аңа Бөтенроссия авыл Сабантуен үткәрү эстафетасы тапшырылды», – диде ул.
- 2026 елда Бөтенроссия авыл Сабан туе Пенза өлкәсенең Кече Труев авылында узачак