Хәвеф-хәтәр 28 декабрь 2020 13:40

Армиядә хезмәттәшләренә аткан Рамил Шәмсетдиновны присяжныйлар суды гаепле дип тапты

Ул үзе бу гамәлен хәрби частьтә уставта каралмаган мөнәсәбәтләр булу белән аңлата.

Скопировать ссылку

(Казан, 28 декабрь, «Татар-информ»). Присяжныйлар бертавыштан Рамил Шәмсетдиновның Байкал аръягында хәрби хезмәттәшләрен үтерүдә гаепле, ләкин мәрхәмәткә хокуклы дип тапты. Бу хакта РИА Новости хәбәр итә.

Бүген Читадагы Икенче Көнчыгыш өлкә хәрби суды присяжныйларның карарын тыңлады. Алдарак суд утырышларында гаепләүче як, Шәмсетдинов гаепле һәм мәрхәмәткә лаек түгел дип белдергән иде.

«Присяжныйлар бертавыштан срочник Шәмсетдиновны Байкал аръягы хәрби частендә ике һәм аннан да күбрәк кеше үтерүдә һәм хезмәттәшләренә һөҗүм итүдә гаепле, әмма мәрхәмәткә хокуклы дип тапты», — диделәр судта.

Рамил Шәмсетдинов 2019 елның 25 октябрендә Читадагы хәрби частьтә хезмәт иткән ике офицерны, алты хезмәттәшен атып үтергән һәм ике кешене яраланган. Егет үзе бу гамәлен хәрби частьтә уставта каралмаган мөнәсәбәтләр булу белән аңлата. Аңа «Ике һәм аннан да күбрәк кешене үтерү» һәм «Ике кешене үтерергә маташу» маддәләре буенча гаепләү белдерелгән. Эшне присяжныйлар коллегиясе карый, дип язган идек.

Сәхифәләр

Армиядә хезмәттәшләренә аткан Рамил Шәмсетдиновны присяжныйлар суды гаепле дип тапты