Илсур Метшин: Быел Казанда мәктәп укучылары, узган елга караганда, 8 меңгә күбрәк
Шәһәр башлыгы бүген Казан мәктәпләре 182 мең укучы өчен ишекләрен ачканын искәртте.
Быел Казанда мәктәп укучылары, узган елга караганда, 8 меңгә күбрәк. Бу хакта Казан мэры Илсур Метшин Совет районындагы «Весна-2» микрорайонында 95 нче яңа лицей ачылышында әйтте.
Шәһәр башлыгы бүген Казан мәктәпләре 182 мең укучы өчен ишекләрен ачканын искәртте. «Бу, узган елга караганда, 8 меңгә күбрәк. Ата-аналарга укучылар сафын тулыландырганнары өчен рәхмәт. Шулай дәвам итәр дип ышанабыз. Бүген 18 мең беренче сыйныф укучысы беренче кыңгырау тавышын ишетәчәк», – диде мэр.
Илсур Метшин бүген Казанда 4 мең укучыга өч яңа мәктәп ачылуын әйтте, Шиһабетдин Мәрҗани исемендәге 2 нче татар гимназиясенең яңа корылмасы төзелгәнен искәртте.
Татарстан Рәисе Рөстәм Миңнеханов бүген республикада 500 меңнән артык бала мәктәпләргә барганын әйтте. "Узган елга караганда балалар саны 8 меңгә күбрәк булуы халыкның перспективалары яхшы булуы турында сөйли», – диде ул.