Сәхифәләр
«Татар-информ» мәгълүмат агентлыгы баш редакторы
Ринат Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор
Рәмис Латыйпов
Баш редактор урынбасары
Ләйсән Хафизова
Илфир Якупов Тинчурин театрының юбилей кичәсендә: Бу татар театрларының бәйрәме
Бүген Кәрим Тинчурин исемендәге дәүләт театрының 90 еллык юбилей кичәсендә башка театр вәкилләре дә тәбрикләү сүзләре белән чыгыш ясады. «Бу Тинчурин театры гына түгел, татар театрларының бәйрәме», - диде Галиәсгар Камал исемендәге татар дәүләт академия театры директоры Илфир Якупов.
«Тарихтан беләбез: татар театрлары бер-берсенә ярдәм итеп, дус булып яши. Мин бүген театрларда эшләүче төрле һөнәр ияләренә рәхмәт әйтәсем килә. Театр - иң катлаулы сәнгатьләрнең берсе, монда артистлар гына түгел, артистлар алар - театрның бер кыйпылчыгы гына, спектакльне җиткерүчеләр, сәхнә артында эшләүчеләргә бик зур рәхмәт әйтәсем килә. Бәйрәм белән!» - дип котлады Илфир Якупов.
Ул тинчуринлыларны татар театрлары, М. Җәлил исемендәге опера һәм балет театры, курчак театры исеменнән тәбрикләде, бүләккә берничә принтер тапшыруларын әйтте. «Принтер - театрга кирәкле әйбер. Аннан бер генә белдерү чыгарылсын: «бүгенге спектакльгә билетлар бетте» дигәне генә», - дигән теләген җиткерде Якупов.
Марсель Сәлимҗанов исемендәге Актерлар йорты директоры Эльмира Фәтхуллина Тинчурин театры коллективын Татарстан Театр әһелләре берлеге исеменнән котлады.
«90 нчы сезон ул - тарих, традицияләр, йөзләгән-меңләгән спектакльләр, талантлы артистлар, драматурглар, шушы театрга гашыйк тамашачылар. Чын күңелдән сезне котлыйбыз, яңа иҗади җиңүләр телибез. Бу театрда хезмәт куючы һәркемгә сәламәтлек, уңышлар!» - дип мөрәҗәгать итте.
Бәйрәм кичәсендә тәбрикләү чыгышлары театр артистлары башкаруында җырлар белән бергә үрелеп барды.
Шулай ук, артистларга дәүләт бүләкләре тапшырылды.
Кызыклы яңалыкларны күзәтеп бару өчен Телеграм-каналга язылыгыз