Әхмәтов: Ярминкәдә бәяләр сәүдә челтәрләрендәгегә караганда түбәнрәк булачак
Республикада авыл хуҗалыгы ярминкәләре атна саен шимбә көннәрендә 28 декабрьгә кадәр үткәреләчәк.
(Казан, 14 сентябрь, «Татар-информ»). Республикада бүгенге көннән инде күркәм традициягә әверелгән авыл хуҗалыгы ярминкәләре башланды. Бүген ТР Премьер-министры урынбасары – авыл хуҗалыгы һәм азык-төлек министры Марат Әхмәтов республика Хөкүмәте йортында узган киңәшмәдә шул хакта хәбәр итте.
Татарстанның барлык районнары белән видеоконференцэлемтә режимындагы киңәшмәне ТР Премьер-министры Алексей Песошин үткәрде.
ТР авыл хуҗалыгы һәм азык-төлек министры искәрткәнчә, авыл хуҗалыгы ярминкәләре атна саен шимбә көннәрендә 28 декабрьгә кадәр үткәреләчәк.
«Узган еллардагы кебек үк, Казанда ярминкә мәйданчыгы сыйфатында – 15, Чаллы шәһәрендә һәм Яшел Үзән районында икешәр урын билгеләнде», - диде Марат Әхмәтов.
Министр сүзләренчә, ярминкәләрдә авыл хуҗалыгы продукциясенең бәясе сәүдә челтәрләрендәгегә караганда 20-25 процентка арзанрак булачак.