Covid-19 сәбәпле, Татарстан обсерваторларында 71 кеше табиблар күзәтүендә кала
Россия төбәкләре арасында Татарстан авыру дәрәҗәсе буенча 79нчы урында тора.
(Казан, 27 июнь, «Татар-информ», Надежда Гордеева). Татарстан обсерваторларында 71 кеше табиблар күзәтүендә кала. Бу хакта «Татар-информ» мәгълүмат агентлыгында узган матбугат конференциясендә Роспотребнадзорның Татарстан буенча идарәсе җитәкчесе урынбасары Любовь Авдонина хәбәр итте.
«Чит илдән килгән затларны күзәтү чоры тәмамлана. Исегезгә төшерәм, соңгы срок — 1 июль. Бүгенге көндә обсерваторларда 71 кеше бар. Авырулар белән элемтәдә булган 1325 кеше табиблар күзәтүендә кала», — дип сөйләде спикер.
Авдонина сүзләренчә, Татарстан аэропортларында тәүлек эчендә Россия субъектларыннан килгән 35 һава судносы тикшерелгән. «3095 пассажир каралды. Йогышлы авыру симптомнары булган затлар ачыкланмаган», — диде ул.
Бүгенгә Россия төбәкләре арасында Татарстан авыру дәрәҗәсе буенча 79нчы урында (узган атнада — 78 нче урында). Идел буе федераль округы субъектлары арасында 13нче урынны алып тора.