Авыл 18 сентябрь 2018 16:32

Быел Татарстан басуларында көнбагыш уңышын калдырмаска җыеналар

Республика кырларында көнбагыш урагына октябрь башында керешәчәкләр.

Скопировать ссылку

(Казан, 18 сентябрь, “Татар-информ”, Чулпан Шакирова). Татарстан басуларында үсүче көнбагышның өлгереше начар түгел. Шуңа күрә ул быел җыелмыйча калмаска тиеш. Бу хакта бүген “Татар-информ” хәбәрчесенең соравына җавап итеп, авыл хуҗалыгы министры урынбасары Илдус Габдрахманов әйтте.

“Республика кырларында көнбагыш 128 мең гектарда үсә. Чыннан да узган ел, температура режимы аяк чалу, җәй салкынрак килү аркасында, җитешеп бетмичә, җыелып бетелмәгән мәйданнар калды. Быел көнбагышларның халәте начар түгел. Без инде кайбер урыннарда өстән сиптереп, тизрәк корыту эшен дә башкарабыз. Шуңа күрә октябрь башларында көнбагыш суктыру эшенә керешербез дип уйлыйм. Уңыш күләме буенча да начар булырга тиеш түгел”, - диде министр урынбасары.

Илдус Габдрахманов сүзләренчә, бүгенге көндә кем рапс яки көнбагыш үстерә, алар һәрвакыт отышта.

“Казанда тәүлегенә 1 млн тонна эшкәртә торган май сыгу комбинаты бар. Алар хуҗалыклар белән исәп-хисапны да вакытында ясый. Шуңа күрә майлы культуралар үстерү отышлы”, - дип саный урынбасар.

#авыл хуҗалыгы #Марат Әхмәтов #Илдус Габдрахманов

Сәхифәләр

Быел Татарстан басуларында көнбагыш уңышын калдырмаска җыеналар