«Бөтенроссия Кыр көне» кысаларында Россиянең иң яхшы җир сөрүче механизаторын билгелиләр
«Казан Экспо»да җир сөрү буенча Бөтенроссия чемпионаты ачылды.
«Бөтенроссия Кыр көне» кысаларында җир сөрү буенча унынчы Бөтенроссия чемпионаты үткәрелә. Бүген «Казан Экспо» халыкара күргәзмәләр үзәге территориясендә чемпионатның ачылу тантанасы булды.
Катнашучыларны һәм кунакларны ТР Премьер-министры Алексей Песошин, Россия Федерациясе Авыл хуҗалыгы министры урынбасары Елена Фастова сәламләде.
«Мондый зур вакыйганың Татарстанда узуына без бик шат. Җир эшкәртү буенча ачык чемпионат һәркемгә максималь уңай хисләр бүләк итсен. Бу көннәрне сез Татарстан кырларында рәхәтләнеп үткәрүегезне телим. Чемпионат тәҗрибәле катнашучыларга тагын да зуррак үрләр яуларга ярдәм итсен өчен, ә яңа килүчеләр өчен яңа уңышларга трамплин булды», – диде Алексей Песошин.
Ярышта Россиянең төрле төбәгеннән, шулай ук Беларусь, Казахстан, Кыргызстан һәм Ираннан барлыгы 65 механизатор катнаша. Катнашучылар арасында хатын-кызлар да бар. Елена Фастова хатын-кызларга аерым рәхмәтен белдерде һәм җиңү теләде.
«Сез бүген бик күп, сез илебезнең төрле өлкәләрен тәкъдим итәсез. Барыбызны да Ватаныбызга һәм авыл хуҗалыгына мәхәббәт берләштерә. Мин, хатын-кыз буларак, сезнең сафларда шундый җитди эштә эшләүче кызлар булуына шатланам. Кызлар, сезнең бу ярышта беренче булуыгызны телим», – диде Елена Фастова.
Җир сөрүчеләр чемпионаты өчен 90 гектар территория әзерләнгән. Аның 70 гектарында әзерлек, 20 гектарында финал ярышлары үтәчәк. Бу хакта «Бөтенроссия Кыр көне»нә багышланган матбугат конференциясендә ТР авыл хуҗалыгы һәм азык-төлек министры Марат Җәббаров хәбәр иткән иде.
Чемпионатның беренче этабы иртәгә башлана. Механизаторлар, өч сәгать эчендә, бүлеп бирелгән җирне МТЗ тракторында махсус прицеп ярдәмендә сукаларга, эшкәртергә тиеш. Чемпионат җиңүчесенә трактор бүләк итәчәкләр. Финал ярышлары 9 июльдә була. Хөкемдарлар буларак, Россиянең төрле югары белем бирү йортларында эшләүче авыл хуҗалыгы өлкәсе профессорлары сайланган.
