Бөгелмә янында «КАМАЗ» белән булган һәлакәт видеосы чыкты
Бүген көндез Бөгелмә тирәли әйләнгеч юлда ике йөк машинасы бәрелешкән.
(Казан, 28 октябрь, «Татар-информ»). Бөгелмә янында «КамАЗ» шоферы һәлак булган юл-транспорт фаҗигасе видеога эләккән. Ролик социаль челтәрләрдә чыкты.
Кадрларда машиналар күп булуы күренә. Күпмедер вакыттан соң «КамАЗ» машинасы йөртүчесе каршы як полосага чыга, анда ул фура белән кара-каршы бәрелешә. Машиналарның икесе дә юл кырыена төшеп китә.
«Татар-информ» мәгълүмат агентлыгы элек хәбәр иткәнчә, бүген төш вакыты тирәсендә металл конструкцияләр төяп бара торган «КАМАЗ» һәм Үзбәкстан номерлары булган «МАН» фурасы Бөгелмә янында кара-каршы бәрелешкән. Юл-транспорт һәлакәтендә безнең илдә ясалган йөк машинасының йөртүчесе үлгән. Чит ил автомобилен йөртүче ир-ат авыр җәрәхәтләр алган, аны хастаханәгә илткәннәр.
