Әнвәр Алмаев: Татар эшмәкәрләре белән очрашу төрле мәсьәләләрне хәл итәргә булыша

Әстерхан өлкәсе «Дуслык» татар мәдәнияте оешмасы рәисе Әнвәр Алмаев фикеренчә, татар эшмәкәрләре белән очрашу тәҗрибә белән алмашырга, төрле мәсьәләләрне хәл итәргә ярдәм итә. Ул «Корстон» сәүдә-күңел ачу комплексында Бөтендөнья татар конгрессының XIII Бөтенроссия татар авыллары эшмәкәрләре җыенының пленар утырышында чыгыш ясады.

«Узган елга нәтиҗәләр ясалган, башланып киткән елга план-максатлар билгеләнгән бу җыелышларның ни кадәр уйланылган, кирәкле чара булуын без тиз төшендек. Чөнки бу очрашулар безгә горизонталь яссылыкта күрше төбәкләр белән үзара тагын да якыннан танышу, аралашу, дуслашу, хезмәттәшлек итү, тәҗрибә алмашу өчен мөмкинлек тудыра. Без хәзер Казанда гына очрашып калмыйча үзара чараларыбызда төбәкләрдә бергә җыелабыз», – диде ул.

Аның әйтүенчә, Төньяк Кавказ федераль округы белән бергә узган Көньяк федераль округның беренче җыены 2018 елда Әстерхан өлкәсендә булган. «Аннан соңгы елларда Краснодар краенда, Ростов өлкәсендә, Ставрополь краенда, Төньяк Осетия Республикасы һәм Волгоград өлкәләрендә җыелганнар. Быелгы җыен исә Адыгея Республикасында оештырылган иде», - диде Әнвәр Алмаев.

«Җыеннар вакытында район, авылларга барабыз, халык белән аралашабыз, аларны борчыган проблемаларны өйрәнәбез. Төбәк җитәкчеләренә җиткерәбез. Бу Татарстанның һәм аның Рәисе, Бөтендөнья татар конгрессының авторитетын күрсәтә. Мондый очрашулардан соң күп мәсьәләләр хәл ителә», - диде Әстерхан өлкәсе «Дуслык» татар мәдәнияте оешмасы рәисе.

Ул быел җыенны тагын да югары дәрәҗәдә оештырылганын әйтте. «Без, читтә яшәүче татарлар, республиканың тәҗрибәсенә, Сезнең авторитетка таянып эш итәбез. Татарстан үскән саен төбәкләр дә көчлерәк була. Башкаларның карашлары да яхшы якка үзгәрә. Моның өчен Сезгә рәхмәт. Алга таба да бер-беребезгә кирәк булып яшик. Бердәмлектә безнең көч, дигән сүзләрне беркайчан да онытмагыз», - диде.

Әнвәр Алмаев 35 ел Әстерхан өлкәсендә «Дуслык» татар мәдәнияте оешмасын җитәкләвен билгеләп үтте. «Бу дәвердә күп эшләр эшләнде. Габдулла Тукай, Муса Җәлилгә һәйкәлләр куелды, Сабантуйлары үткәрелде. Татар теле укытылган класслар ачылды. Әстерханның 74 мәктәбенә Габдулла Тукай исеме бирелде», - диде ул.

• 26-28 февральдә Бөтендөнья татар конгрессы XIII Бөтенроссия татар авыллары эшмәкәрләре җыенын уздыра. Быел әлеге җыенга Россия Федерациясенең 48 төбәгеннән, шулай ук Татарстаннан 900 кече бизнес вәкилләре, фермер хуҗалыклары җитәкчеләре һәм хакимият органнары вәкилләре җыелды. Өч көнлек программада дискуссион мәйданчыкларда эшләү, Татарстан Рәисе катнашында пленар утырыш, Татарстанның Апас һәм Тәтеш районнарына сәфәр һәм мәдәни программа каралды.