Андрей Кондратьев «Бердәм Россия» партиясендә эшчәнлеген туктатып торырга ниятли
Россия Үзәк сайлау комиссиясе Татарстан Президентына Андрей Кондратьевны республика Үзәк сайлау комиссиясенең хәлиткеч тавыш хокукына ия әгъзасы итеп билгеләү тәкъдиме белән мөрәҗәгать итәчәк.
(Казан, 11 март, «Татар-информ»). Татарстанда «Бердәм Россия» төбәк бүлегенең башкарма комитеты җитәкчесе Андрей Кондратьев Татарстан Үзәк сайлау комиссиясе рәисе итеп сайланган очракта партия әгъзасы булмаячак. Бу хакта Андрей Кондратьев Россия Үзәк сайлау комиссиясе утырышында хәбәр итте.
«Әгәр сез ярдәм итсәгез, мин актив эшләячәкмен, ышанычны акларга тырышачакмын. Татарстан Үзәк сайлау комиссиясе ышаныч белдерсә, партия әгъзасы булудан туктап торам һәм бу адымны әлеге урында эшләү өчен принципиаль мөһим дип саныйм», — диде Андрей Кондратьев, Россия Үзәк сайлау комиссиясе җитәкчесе Элла Памфилованың соравына җавап биреп.
Россия Үзәк сайлау комиссиясе бүген Татарстан Президенты Рөстәм Миңнехановка Андрей Кондратьевны Татарстан Үзәк сайлау комиссиясенең хәлиткеч тавыш хокукына ия әгъзасы итеп билгеләү тәкъдиме белән мөрәҗәгать итәргә карар кабул итте.