Марат Әхмәтов Кайбыч районында урып-җыю эшләренең барышы белән танышты

(Казан, 3 август, «Татар-информ»). ТР Премьер-министры урынбасары – авыл хуҗалыгы һәм азык-төлек министры Марат Әхмәтов Кайбыч районында урып-җыю эшләренең барышы белән танышты. Бу хакта ТР Авыл хуҗалыгы һәм азык-төлек министрлыгының матбугат хезмәте хәбәр итә.

«Дубрава» җәмгыятендә шикәр чөгендереннән яхшы уңыш көтәләр: 320 гектар мәйданны биләгән басуда уңыш гектарыннан 300 центнер тәшкил итәргә мөмкин.

Министр шулай ук Мөрәле, Арслан, Кыр Буасы авыллары, Кошман авылының Марат Садриев крестьян-фермер хуҗалыгында көзге бодай басуларын карады. Барлык хуҗалыкларда да урып-җыю эшләре бара. «Подберезье» агрофирмасы кырларында арыш суктырырга керешкәннәр, аның уңышы югары – гектарыннан 42 центнерга җитә.

Шуннан соң ведомство башлыгы район аграрийлары белән очрашты. Министр билгеләп үткәнчә, яхшы һава торышы урып-җыю эшләрен сыйфатлы итеп һәм вакытында башкарырга мөмкинлек бирә.

Район башлыгы Альберт Рәхмәтуллин Кайбычта көзге культураларның 7 мең гектарга якын мәйданда игелүен билгеләп үтте. Быел чәчүлекләрнең мәйданын 11 мең гектарга җиткерү күздә тотыла. Ул шулай ук игеннәрне югатуларсыз һәм вакытында җыеп алачакбыз дип ышандырды.