КФУда Гөлүсә Закированың хәрби операциягә багышланган «Энекәш» китабын тәкъдим иттеләр

1 апрель көнне Казан федераль университетының Филология һәм мәдәниятара багланышлар институтында язучы, журналист, «Мәгариф» һәм «Гаилә һәм мәктәп» журналлары баш мөхәррире Гөлүсә Закированың «Казан утлары» китапханәсе» сериясендә басылып чыккан «Энекәш» китабын тәкъдим итү чарасы узды.

Кичә Филология институтының Татар әдәбияты кафедрасы, «Татмедиа» акционерлык җәмгыяте белән берлектә оештырылды. Очрашуга татар филологиясе, журналистика юнәлешендә укучы студентлар, институт мөгаллимнәре җыелган иде.

• Китапны киң җәмәгатьчелеккә тәкъдим итү чарасы 19 март көнне «Татмедиа» бинасында урнашкан «Әдәби кафе»да булды

«Энекәш» – татар телендә махсус хәрби операциягә багышланган беренче китап. Гөлүсә Закирова студентларны һәм килгән кунакларны кыскача китапның язылу тарихы белән таныштырды.

«Баштан әлеге китап бастырылу өчен язылмады. Ул якын кешең өчен кайгыру, сыкранудан, әлеге авыр халәткә чыдый алмаганга кулга каләм алу булды. Андый мизгелдә – ярый безнең каләм бар әле дисең. Китапта бер генә вакыйга да бармактан суырып чыгарылмаган, әлеге вакыйгалар һәммәсе дә безнең гаиләгә бәйле. Китапта булган барлык вакыйгалар, егетләр минем язмышым аша үттеләр, аларның барысының да прототибы бар. Ул – бер гаилә тарихы, «Татмедиа»да тәкъдим итү чарасында әлеге китап – татар телендә махсус хәрби операция турында беренче китап, дип игълан ителде», – диде ул.

Чара барышында китаптагы өзекләр Филология һәм мәдәниятара багланышлар институтының «Мизгел» яшьләр театры артистлары тарафыннан театральләштерелде. Физик белән аның якын дусты, шулай ук махсус операциядә һәлак Сулим арасында диалоглар, хәрбинең авылга ялга кайткач, әтисенең каршы алуы – китап ташамашачылар алдында җанланды.

«Мин бик дулкынландым – язганда бер халәт кичерсәң, анан әсәрне мондый сәхнәләштерелгән форматта карау ул бөтенләй икенче төрле тәэсир. Рәхмәт сезгә, бик матур, шул ук вакытта җан өзгеч килеп чыкты. Мин мондый очрашу булыр дип көтмәгән дә идем, гадәттә алар «дежур» форматта уза », – диде Гөлүсә Закирова оештыручыларга һәм студентларга рәхмәт белдереп.

«Энекәш» китабы Гөлүсә Закированың махсус операциядә һәлак булган бертуган энесе Илнур Закировка багышлана. Илнур 2022 елның октябрь аенда мобилизацияләнеп, 1234 полкта пулеметчы булып хезмәт итә. 2024 елның язында яралана, реабилитация узганнан соң кабат үз полкына кушыла. 2025 елның 21 гыйнварда һәлак. Һәлак булганнан соң «Махсус хәрби операциядә катнашучы», «Батырлык өчен» медальләре белән бүләкләнә.

• Гөлүсә Закированың «Энекәш» китабын «Казан утлары» журналы редакциясеннән, Декабристлар урамы, 2 йорттагы «Әдәби кафе»дан, Татарстан районнарындагы «Татмедиа» офисларында һәм интернеттагы сәүдә нокталарыннан алып була.