Фән һәм мәгариф 3 октябрь 2023 09:00

Зур уңышларга ирешкән укытучыларның сурәтләрен Казанда билбордларда урнаштырачаклар

Скопировать ссылку

Бөтендөнья укытучылар көненә шәһәр билбордларында үз хезмәтләре белән аерылып торган 23 педагогның фотолары урнаштырылачак. Акция шәһәр Башкарма комитетының Мәгариф идарәсе тарафыннан оештырылган. Бу турыда Казан мэриясе хәбәр итте.

«Кешеләрнең педагогларыбызның һәм алар төрле фестивальләргә, олимпиадаларга һәм ярышларга әзерләгән балаларыбызның казанышлары турында белүе бик мөһим. Бер генә яулаган уңыш та игътибарсыз калырга тиеш түгел. Вакытында рәхмәт әйтү – безнең бурычыбыз. Укытучыларны билбордлар аша Укытучылар көнендә генә котлап калмыйча, гадәти көннәрдә дә хөрмәтебезне күрсәтү мөмкинлеген табарга кирәк. Шәһәр җәмәгатьчелеге дә безнең «геройлар»ыбыз турында белергә тиеш. Бу табибларга да, хокук саклау органнары хезмәткәрләренә дә, транспортчыларга да кагыла», – диде Казан мэры Илсур Метшин.

Төп магистральләрдә барлыгы 15 тышкы билборд булачак: Җиңү проспекты, Оренбург тракты һәм башкалар. Шулай ук котлаулар метрополитенның барлык станцияләрендәге экраннарга урнаштырыла.

Стендларда зур эш тәҗрибәсе булган педагогларны, профессиональ конкурсларда җиңүчеләрне һәм олимпиадачыларны әзерләүчеләрне күрергә мөмкин була, диелә хәбәрдә.

Сәхифәләр

Зур уңышларга ирешкән укытучыларның сурәтләрен Казанда билбордларда урнаштырачаклар