Зур Кукмара халкы махсус операция хәрбиләре өчен 200 килограммнан артык чәкчәк пешерә
Кукмара районы халкы ай саен фронтка гуманитар ярдәм җыеп җибәрә. Чираттагы ярдәм акциясен Зур Кукмара авылы халкы уздырган. Мәдәният йортында хатын-кызлар һәм ир-атлар бергә җыелып чәкчәк пешергән. Бу эш икенче мәртәбә уздырыла инде һәм авыл халкы узган юлы булган күләмне арттырып җибәрергә җыена.
«Узган юлы без 220 йомыркадан һәм 8 килограмм майдан пешердек. 200 килограммнан артык чәкчәк чыкты. Бу юлы тагын да күбрәк пешерергә җыенабыз», – дип сөйләгән Гөлнур Хаҗиева.
Хатын-кызлар камыр баскан, аны телемләп кискән һәм майда кыздырган. Аларга ир-атлар да кушылган. Җирле оста Рөстәм Нәбиев чәкчәк әзерләүне тизләтә торган махсус җайланма ясаган.
Фото: Адилә Шакирова
«Мин кер юа торган машинаның эчке өлешен кулландым, шунда совет үрнәгендәге комфорка урнаштырдым. Барысын да үзгәртеп эшләдек, хәзер монда чәкчәк кенә түгел, ә пылау һәм шурпа да пешереп була», – дип сөйләгән ул.
Тәм-томнардан тыш, авыл халкы фронтка җылы кием-салым, оеклар һәм әбиләр бәйләгән башка кирәк-ярак та җибәрә.
Фото: Адилә Шакирова
«Без бөтен нәрсә белән булышырга тырышабыз: моңа кадәр маскировка челтәрләре үрдек, хәзер яңадан чәкчәк әзерлибез. Барысы да безнең сакчыларыбыз өчен!» – дип сөйләгән Розалия Ибраһимова.
Кукмара халкы һәркем керткән өлеш мөһим, ә кул җылысы һәм таяныч сугышчыларны илһамландыра һәм аларга көч бирә, дип ышана.
Язма Әдилә Шакирова ярдәме белән әзерләнде.